Highway 27 tha, Main bike pe sawaar tha, Raftaar 90 paar thi,
Soch raha tha ye wali ke pichle walli, Zyada ghatiya kaunsi sarkaar thi,
Donon or baajre ki fasal peeli pad rahi thi,
Duniya dekh ke mere mann ki khaal neeli pad rahi thi,
fir bhi soch raha tha koi khushi ka geet gungunane ko,
mann me tooti footi sahi, bachi hui koi taar thi,
Highway 27 tha, Main bike pe sawaar tha, Raftaar 90 paar thi,
Soch raha tha ye wali ke ya pichle walli, Zyada ghatiya kaunsi sarkaar thi,
Ki Tabhi….
Ek tilti aakar lagi, mere helmet ki screen par,
ek dhabba wahin ban gaya, ek katra gira meri jean par,
ek pankh wahin tha chipka, ek pankh kahin tha hawa mein,
us kachhi maut ka shayad, tha iklauta gawaah main,
fir laga sochme main, ki wo maada thi ki nar tha,
kya uske bhi the bachhe, kya uska bhi koi ghar tha,
fir yaad aaya ki,
pichle mod par,
kisi board par,
vigyapan ke bajoo me thodi jagah chhodkar,
likha hua tha,
Raftaar jaanleva hai!!!!

“Speed Thrills But Kills”